Во 6-те основни и 2-те  подрачни училишта во  општината Ѓорче Петров, 410 првачиња за прв пат седнаа во школските клупи. Нивните постари другарчиња подготвија пригодни програми со кои им посакаа добредојде на првачињата. Градоначалникот на општината Сокол Митровски присуствуваше на една таква свеченост во О.У “Јоаким Крчовски” во Волково, а успешно започнување на учебната година им посака и на првачињата во истоименото подрачното училиште во с. Никиштани. Воедно им посака успешна работа на наставниците и на сите ученици.

Голем спортски дух на турнирот во мал фудбал „Ѓорче Петров куп 2017“
Љубителите на фудбалот во спортско Ѓорче Петров покажаа голем спортски дух во одиграните натпревари синоќа на повеќенаменското игралиште . На првите натпревари од групната фаза гледачите имаа можност да видат атрактивни голови постигнати од екипите што е одлична најава за почеток на овој традиционален настан.

На 02 Септември 2017 г. на мултифункционалното игралиште кај надвозникот во Ѓорче Петров, со почеток од 20.00 часот ќе започне по 4-ти пат традиционалниот турнир во мал фудбал во организација на Здружение на граѓани „Ѓорче Петров Куп“ кој годинава за прв пат станува и меѓународен. На турнирот за прв пат ќе учествува и екипа од соседна Србија. На турнирот пријавени се 20 екипи од цела држава,  а судиите се распоредени од ФФМ. Наградниот фонд за прво место изнесува 120.000 денари, второ место 60.000 денари, трето место 30.000 денари, а за четврто место 10.000 денари.

Завршени се  90 %  од градежните работи за целосна реконструкција на Домот на култура во с. Кучково. Со реконструкцијата која ќе чини 5 милиони денари домот ќе добие нова сала за состаноци, простории за амбуланта со чекална, канцеларија за месната заедница и два санитарни чвора. Поставени се нови прозори и врати, под и кровна конструкција. Воведена е комплетно нова водоводна и електрична мрежа. Градежните работи ги изведува „Свеан инвест ДОО Скопје“.

Отворената забавна фудбалска школа „Ѓорче Петров“ се одржа по 16-ти пат во Општина Ѓорче Петров. Спортски тимски дух и позитивна атмосфера можеа да се забележат меѓу младите  кои на стадионот „Македонски лавови“ во општината Ѓорче Петров уште еднаш ја докажаа заложбата, масовно да се вклучат во спортот  преку игра и забава. Околу 200-тина ученици од основните училишта од општината придружувани од своите одделенски наставници учествуваа во летната забавна фудбалска школа во организација на општината Ѓорче Петров. Фудбалските тимови беа составени од момчиња и девојчиња на возраст од 6 до 11 години.