Со 13 гласа “за” Советот на општина Ѓорче Петров денеска го изгласа Буџетот за 2018 година. Вкупниот консолидиран буџет изнесува 693.828.800 денари, или 11.282.000 евра. Од ова, основен буџет е 424.917.800 денари или седум милиони евра. Овој буџет се остварува од основните изворни приходи како персонален данок, данок на имот, трансфери од други нивоа на власт, капитални приходи... За разлика од 2017 година, буџетот на општината е поголем за милион и 790 илјади евра.

Во 11 часот во просториите на општина Ѓорче Петров ќе се се одржи седница на Советот.  На дневен ред е Предлог-буџетот за 2018 година.

Градоначалникот на општина Ѓорче Петров, Александар Наумоски во својот кабинет оствари средба со сликарот и директор на галеријата “Остен”, Мице Јанкуловски. Познатиот автор кој има остварено 40 изложби во земјата и низ светот, и е добитник на многубројни домашни и меѓународни награди му го честиташе изборот на Наумоски за градоначалник на општината и му посака многу успеси, но и залагања во областа на културата кои ќе го покренат нивото на уметноста во овој дел од Скопје. Тој истовремено ги изнесе и своите идеи како да се заживее културата на ниво на општина.

Во просториите на општина Ѓорче Петров беше потпишан меморандум за соработка меѓу локалната самоуправа и Центарот за управување со промени (ЦУП) за проект за партиципативно раководење со буџетот на општината. Градоначалникот Александар Наумоски и извршниот директор на ЦУП, Неда Малеска – Сачмароска го потпишаа меморандумот во рамки на проектот “Мои пари, моја одговорност: партиципативно раководење со буџетот на општините во Република Македонија”, кој е поддржан од УСАИД, спроведуван од мрежата на граѓански организации ФИСКАСТ, а ќе трае до мај 2020 година.

Градоначалникот на општина Ѓорче Петров, Александар Наумоски присуствуваше на новогодишен ручек организиран за лица со посебни потреби на покана на ресторанот “Камин кама”, лоциран во Ѓорче Петров. Наумоски ја искористи можноста на присутните да им ги честита претстојните новогодишни и божикни празници. Истовремено, градоначалникот истакна дека имајќи в предвид оти една од најранливите категории се лицата со посебни потреби, општината ќе изготви локална стратегија за подобрување на условите и на пристапноста за овие лица.